Pages

Wednesday, November 4, 2009

عملت ملوخية بالينسون وده هو الجديد :D

السلام عليكم ورحمة الله وبركاته

ندخل في الموضوع على طول

أمي سافرت يوم الخميس اللي فات وراااااااااااااااااااااحت الإمارات

وبما إني أنا البنت اللي فاضلة في البيت فأكيد أنا اللي هاطبخ

من يوم الخميس ليوم الثلاثاء كانت الأمور لطيفة جدا والأكل كان لطيف جدا وكل البيت كان معجب بيه جدا

قلت النهاردة أجرب الملوخية فكلمت أختي كالعادة وقلتلها قوليلي كده الملوخية بتتعملي إزاي :D

قالت لي الطريقة الطبيعية اللي كل الناس عارفاها وقالت لي حطي عليها كوزبرة وتوم

التوم معروف لكن مين الأخ كوزبرة ده ،، كل معرفتي بالبشمهندس دي زي بالظبط معرفتي برئيس وزراء هونج كونج

المهم لقيت حاجة غريبة الشأن موجودة مع التوابل فقلت أكييييييييييد هي دي الكوزبرة ، حطيتها على التقلية وحسيت إن شكلها زي اللي ماما بتعملها فاتبسطت أوي وقولت أنا أنجزت

المهم آجي أدوق طعمها حسيت إنه مش زي الطعم الطبيعي اللي أنا طول عمري بادوقه

ده بالإضافة لإن معلوماتي الغريبة اللي باخدها من الناس في الطبيخ أدت لإن الكبسة برضه طلعت غريبة فحسيت إن الأكل بيضيع من إيدي فقلت لاااااااااااااااااااااازم تدخل جراحي

كلمت أختي تيجي حالا تنقذ الموقف

وبعد الكشف قالت لي مبروك الملوخية بالينسون :D

قولتلها والله ده الجديد :D

الحمد لله حاولنا إنقاذ ما يمكن إنقاذه والأكل طلع جميل

وللعلم أنا كنت عاملة الملوخية علشان الكبسة لو طلعت مش مظبوطة فالحمد لله الأكلة السنيدة طلعت مش سنيدة خالص

بس علشان برستيجي وسط الناس اللحمة طلعت تحفة والكبسة زودناها شوية رز كمان فطلعت برضه تحفة

بس يا خوفي من كتر تحفتها تتحط في المتحف :D

وبالهنا والشفا

3 comments:

Laila Safoury said...

يا انو يا رافعة راسنا ..

من اول المكرونة بالباشميل لحد كوبية النسكويك :) ...

Wanda said...

لذيذة التجربة :-)
بس صحيح
"الحمد لله حاولنا إنقاذ ما يمكن إنقاذه والأكل طلع جميل"
ازاى؟؟

MoYo said...

I like your blog ... keep it up,

Bro,