Pages

Friday, January 25, 2008

هييييييييه خدنا الاجازة

السلام عليكم ورحمة الله وبركاته

خدنا الاجازة اخيرررررررررررا
أخيرا جيه وقت الإبداع مش النوم والتليفزيون
لو قلنا ان وقت الدراسة للمذاكرة والتعب ووقت الاجازة للعب والنوم والتليفزيون والخروجات
طيب امتى وقت الابداع امتى وقت الشغل بمزاج وانك تطلع كل طاقاتك
انا شايفة ان الاجازة ديه فرصه انا مش هاعرف اعوضها تاني فرصة جاتلي لحد عندي علشان ابدع واتعلم حاجات كتير انا باحبها

يعني مثلا انا الاجازة ديه نفسي جدا ادرب نفسي اني كل يوم الصبح انزل اتمشى طبعا ده ماكنش بيحصل وقت الدراسة لاننا كنا كل يوم الصبح كنا بنروح الكلية

نفسي بجد اقعد مع اهلي اللي ماكنتش باشوفهم تقريبا وقت الدراسة
والله مامتي اوقات كانت بتقولي انتي قاعدة في لوكانده بتيجي على النوم فهما ليهم جزء كبير اوي في الاجازة ديه ان شاء الله
نفسي اقرب من اخواتي اكتر واتكلم معاهم ونخرج مع بعض
انا ليه 5 اخوات ومنهم 3 متجوزين فطبعا حياتهم بقت الى حد ما مش زي الاول كل واحد - وده حقهم طبعا - بقى ليه حياته وحتى الايام اللي كانوا بيجوا فيها عندنا ممكن اكون مش موجوده او باذاكر او او او فطبعا في الاجازة ديه هطب عليهم كلهم في بيوتهم او حتى هاكلمهم في التليفون
انتم عارفين اخواتي بفضل الله رزقوا بأولاد انا بحبهم جدا جدا جدا و بحس اني ليا واجب كبير اوي تجاههم واني نفسي اقرب منهم كلهم واتكلم معاهم ونلعب مع بعض لكن ماكنتش بالاقي وقت في الدراسة فلازم لازم اديهم وقت كبير اوي في الاجازة ديه
عارفين احساس وحش اوي لما تكون حاسس ان في ناس ادامك انت نفسك تقدملهم حاجة وانت مش عارف ده بالظبط نفس الشعور مع ولاد اخواتي
يعني في مرة ابن اخويه كان عندنا هو عنده 7 سنين قلتله تعالى احكيلك قصص الانبياء المهم حكيتله قصه فكل ما كان يجي عندنا يقولي احكيلي قصص الانبياء وانا اوقات كتير جدا يا باكون تعبانة جدا ولسه راجعة من الكلية يا باكون باذاكر ومش باعرف احكيله حاجة خالص بابقى مضايقة من نفسي اوي وانا باقوله معلش مش هاقدر احكيلك

نفسي طبعا اخرج واتفسح مع اصحابي ونفسي اوي نعمل حاجات كتير اوي مع بعض
امبارح خرجت معاهم ياااااااه انا رجعت تعبانة جدا بس كنت في قمة سعادتي
نفسي كمان اتعلم مهارات تساعدني في حياتي زي القيادة ومهارات الاتصال والتعامل مع الناس وخصوصا اني داخلة في مشروع كبير ونفسي اكون اد المسؤولية

معرفش ايه اللي خلاني اكتب الكلام ده بس انا بجد مبسوطة جدا بالاجازة ومش عارفة ليه انا مبسوطة اوي كده
ديه اول اجازة اكون مبسوطة كده يمكن لاننا كنا مضغوطين اوي الترم ده بالذات
لكن انا مبسوطة اوي ونفسي اوي اتكلم عن حاجات كتير جدا جدا جدا

جزاكم الله خيرا