حل مشكلتك

السلام عليكم ورحمة الله وبركاته

أوقات كتير باحس إن في ناس كتير لما تحصلهم مشكلة بيفضلوا إنهم ينغلقوا جوا المشكلة دي
ومش كده وبس دي بتأثر سلبيا جدا عليهم
يمكن كلنا مرينا بمشاكل كتير ولكن هل إني أحبس نفسي جوا المشكلة أو إني أتأثر بيها سلبيا ده الصح
هل إني أؤذي نفسي وأؤذي اللي حواليا ده اللي صح ولا إني أحاول أحل المشكلة وأستشير اللي حواليا وأفضفض للناس على مشاكلي يمكن أسمع نصيحة أو ألاقي حل للمشكلة
يا جماعة إيه رأيكم نخرج بره دايرة المشكلة ونروح لدايرة الحل

جربوا ومش هتندموا

مبروك .. خطبت كام مرة السنة دي؟؟

مبروك .. خطبت كام مرة السنة دي؟؟

سهير : بحبك يا أحمد

أحمد : وأنا كمان بحبك أكتر

سهير :طيب وآخرة حبنا

أحمد : حبنا لازم يعيش

سهير : يعني هنعمل إيه يا أحمد؟؟

أحمد : حتقدم لك .. وأخطبك

سهير : هو انت لاقي تاكل يا أحمد..وبعدين أنت لسه في سنة تانية ومحلتكش حاجة ؟؟

أحمد : مش مهم عشانك أتحدى الدنيا .. أنت واثقة فيّ ؟

سهير : طبعا ياأحمد

أحمد : يبقى خلاص ..أنا حتصرف

زملاءنا ..

ليس هذا جزء من مشهد في فيلم هندي .. لكن الحكاية دي أو شبه دي بتحصل في جامعتنا كتير - طبعا مع تغيير الأسماء والأشخاص - و أنا مش هكلم عن شرعية علاقة زي دي لأننا عارفين طبعا إنها حرام .. لكننا فعلا عايزين نتكلم عن الخطوبات اللي بالهبل اللي بنشوفها في الجامعة

في يوم عادي جدا وأنا رايح محاضرة برضه عادي جدا .. ألاقي الشلة بيبصوا على ولد وبنت قاعدين على جنب لوحديهم والإتنين هاتك يا سهتنة .. ولقيتهم بيقولولي : مش فلان خطب فلانة!!.. أقولهم : بجد ؟؟ ..طيب الخطوبة كانت إمتى؟

- لأ.. ما هو محصلش خطوبة

- طيب فين الدبل ؟؟

-لأ.. ماهو مفيش دبل

- يبقى أكيد قرأوا فاتحة ؟؟

- لأ برضه!!

-الله ..أمال اتخطبوا إزاي يعني ؟؟ كده بالنية يعني ولا إيه ؟؟

-أنت مش فاهم .. أصل أهلهم عارفين الموضوع وموافقين

- مش تقولوا كده م الأول!! يا سلام هما دول أهل ؟؟ لا يا جماعة مش معقول وهو في أب يرضى لبنته كده ؟؟

- آه طبعا في !!

- اضرب كف بكف .. وأصرخ : عليه العوض ومنه العوض

بصراحة أن سمعت من مصادر غير موثوق فيها .. إن في أمهات بيوصوا بناتهم يوقعوا عريس .. وطبعا يكون محترم وده عشان أزمة الجواز اليومين دول وقلة العرسان فالأم بتخاف على بنتها من العنوسة .. بس اللي أنا فاهمه إنها توقع عريس .. مش تتخطب كل شوية لعريس

المهم .. تلاقي الواد جارر البنت وراه في كل حتة ومقضين اليوم في الكلية سرمحه ..يا إما قاعدين في كافيتيريا الكلية وشهم في وش بعض وهيمانين ومسهتنين ومتنيلين.. واللي يسأله مين دي يرد : دي الجماعة خطيبتي يعني.. وهي ترد :ده خطيبي...

وفي يوم تاني عادي برضه ..رايح محاضرة .. ألاقي فلان إياه واقف لوحده في حتة وفلانة إياها في حتة تانية .. وطبعا نفس الشلة بيبصوا عليهم ويقولوا : مش فلان و فلانة انفصلوا !! .. يا حلاوة .. لما بسمع الكلام ده بجد ببقى خلاص حتشل .. هما اتخطبوا بجد عشان ينفصلوا ؟؟ .. ناقص تقولوا ده طلقها !!

وطبعا ممكن الشلة تتدخل قي حل الموقف .. والتنسيق بين الطرفين ..وعمل مباحثات مشتركة لحل الأزمة ..ويرجعوا لبعض تاني ..أو كل واحد يشوفله حد تاني يعيش معاه الفيلم من جديد ..وطبعا أوعى حد يجي في دماغه حاجة كده ولا كده كلها خطوبة مش صحوبية وخلاص .. لأ طبعا..ده أحلى م الشرف مفيش !!!

المهم إن كل اللي قابلتهم أو عرفتهم من العالم دول .. أقعد أقنع الواد إن اللي بيعمله ده غلط ..وأقوله : أنت لسه مخلصتش ومحلتكش اللضى ولسه الجيش والشغل .. والجواز زي ما لازم يكون فيه عاطفة لازم يكون فيه عقل برضه .. ولما تعقد تمشي معاها من دلوقتي .. فيقاطعني : أنا مش ماشي معاها .. دي خطبتي

فأرد : ماشي ياعم الكتكوت .. وعلى فرض إنها خطيبتك معايير اختيارك لشريكة حياتك حتتغير بعد الـ 4 أو 5 سنين اللي فاضلنلك

- أنا بحبها ومقدرش أعيش من غيرها.. ولو حصلها حاجة أنا ممكن أموّت نفسي ..ده هيّ النور اللي في حياتي اللي بيصحيني من عز النوم وأقولهم ياجماعة طفوّا النور

- يا بني اللي عايز يتجوز يبني بيته م الأول على رضه ربه عشان يوفقه مش يبتديها بمعصية

- فيقاطعني مرة آخرى : أنا مصمم .. خلاص

- فأنهي الحوار وأنا في قمة القرف : خلاص أنت حر بس افتكر إني في يوم نصحتك

والقصص من دي كتير ..وكل واحد أقابله يحلفلي مية يمين أنه خلاص لقي اللي بيدور عليها .. وأنه مش حيسبها لأي سبب من الأسباب .. وأقعد أحاور وأقنع وأتخانق .. والنتيجة واحدة .. والرد واحد " خلاص يا بني دي بقت خطيبتي " والمشكلة فعلا إن أنا مقتنع جدا جدا جدا إن ده شغل مراهقين والعالم الخطّيبة دول بيخنوقوني من الدور اللي عايشينه ..

المهم تمر الأيام وأقابل صاحبنا ..فأسأله بعد إذيك وبقالي سنة ماشفتكش والكلام ده : إيه أخبار الخطوبة ؟؟

فيحمر وجهه ويبقى عامل زي الطمطماية بتاعت الطبيخ: أصل حصل بينا....

فأقاطعه والنشوى تملأ صدري - اللهم لا شماتة- :أنا يا بني مش قولتلك

يا جماعة.. فعلا أنا قابلت قصص من دي كتيييييييييييييييييير وكلها وهم كبير ..و أنا متأكد إنكم برضه قابلتم قصص خطوبة وهمية والمهم إن الرابط بينها واحد إنها عاطفة مراهقة مندفعة .. وعلى رأي واحد صاحبي إتلدع مرة ففهم الموضوع ..قالي: لو جبت أي واحد وقولتله البنت الجميلة اللي واقفة هناك دي بتحبك - والبنت أصلا واقفة بظهرها وهو مش شايف وشها - حيولقك أنا حبتها وعايز أخطبها.

خالد عمر

دي مصر اللي بتفخر بولادها

لكل محبي عصام الحضري ونادي الأهلي ... إليكم هذا الخبر السعيد
عصام الحضري يعود لمصر
وعلى رأي المثل ... اللي يشرب من مية النيل لازم يرجعلها تاني
دي مصر اللي دايما بتفخر بولادها
وأفرحوا يا شعب مصر الكريم لاقينا اللي نقوله
أرقص يا حضري
ونقول ربيتي يا مصر

إسم التهمة إخواني

وجع وفى قلب يتعبني

فى وسط الليل مغلبني

وبسأل نفسي ليه بابني

وغيري بيهدموا فيكي

وارجع تانى واناديكي

يروح عمري وافديكي

ولو ترضى اكون ليكي

واموت مبسوط ما خاف من سوط

ورغم الضرب اعلى الصوت

لمين غيرك يهون الموت

يامصر يا اعز اوطاني

ولو قالوا فى يوم جاني

واسم التهمة اخوانى

ورغم ما اشوف وما اعاني

هقول برضه يطول عمرك ياسجاني

ويهديك ربي ياجاني

وتعرف حق اوطاني

واموت لو موتى فيه راحتك

واعيش ساكت عشان خاطرك

ولو حكموني بعساكر وجيش كامل

هيفضل قلبي ليكي حامل

وانا راضى وهتحاكم

ومهما يكون مين الحاكم

ولو قالوا فى يوم شاطر

ويعرف يكسب الخاطر

عشان خاطرك لازم اخاطر

لو حتى منش قادر

واصحي ولادي من نومهم

يشوفوا شيطان بيخنقهم

ويسرق بسمه من فوقهم

عشان يبقى على الكرسي

وترسي زي ما ترسي

ياحلى سفينة فى حياتى

عليكي حلم اولادي

ولاجلك كل شئ عادي

يامصر يا غالية يابلادي

اهداء الى المهندس خيرت الشاطر واخوانه

بقلم / محمود المصري

الصحوبية بين الولاد والبنات عيب ولا حرام؟؟

الصحوبية بين الولاد والبنات عيب ولا حرام؟؟

هو عيب ولا حرام
اصحابي كلهم ماشين مع بنات و مش بنت واحدة لا ممكن اكتر من بنت و ماشين معاهم على حب وكلام كدة يعنى وكانوا بيعرضوا عليا أنى اخرج معاهم وهما يعنى حيجبولى بنات وانا اخرج معاهم
بس انا كونت برفض فا ممكن اعرف هو انا كدة عبيط ولا لاء وايه راى حضراتكم مش احسن ما اخرج مع البنت دى النهاردة والتانيه بكرة ويبقى لعب بالبنات صح ولا انا غلطان والنبى ردكم حتى لو حطلعونى غبي مش مهم بس اعرف كدة إيه رايكم

الــــرد

هو عيب وحرام
أولاً: هو عيب:
• عيب انك تخدع بنت لأنها ( أغلب البنات ) ضعيفة بعواطفها، تشتاق لكلمة طيبة، وإن سمعتها من شاب تعلقت به، وظنت أنها ملكت الدنيا بها ، وليس من المروءة أن تخدع الضعيف .
• عيب في حق رجولتك أن يدفعك لما لا تقتنع به أن تكون مثل أصحابك. أنت أنت ولست مضطر أن تكون غيرك فقط كن نفسك تكسبها وتكسب بها.
• عيب انك تشك في نفسك لدرجة أنك تتهم نفسك بالعبط لمجرد أن فطرتك السليمة ترفض فعل خاطئ ورغم أن كل من يفعلوه إلا أن فعلهم لن يغير الخطأ، فيجعله صواباً فكن واثقاً من نفسك ولا تتهمها بل اشكرها وثبتها ثبتك الله.
ثانياً: هو حرام .
• حرام أنك تخون الأمانة وتنقض العهد لقوله صلى الله عليه وسلم:" آية المنافق ثلاث: إذا حدّث كذب, وإذا أؤتمن خان, وإذا وعد أخلف " حديث صحيح..
• صحيح مسلم حديث شريف
• حرام أنك تتخذ أخدان ( رفيقات من غير زواج ) لقوله تعالى مُحْصِنِينَ غَيْرَ مُسَافِحِينَ وَلاَ مُتَّخِذِي أَخْدَانٍ وَمَن يَكْفُرْ بِالإِيمَانِ فَقَدْ حَبِطَ عَمَلُهُ وَهُوَ فِي الآخِرَةِ مِنَ الْخَاسِرِينَ }المائدة5 "
• حرام أنك تنساق وراء الخطأ، وإن كان شائع لقول رسول الله صلى الله عليه وسلم: " لا يكونن أحدكم إمعة يقول أنا مع الناس إن أحسن الناس أحسنت وإن أساؤوا أسأت ولكن وطنوا أنفسكم أن إذا أحسن أن تحسنوا وإن أساؤوا أن تجتنبوا إساءتهم"
باختصار رأينا الذي تسأل عنه هو: اثبت يا راجل على ما أنت فيه واترك شلة الفساد اللي حولك دول، وابحث عن أصحاب كلامهم وحياتهم غير ذلك فيعينوك على الحق بدلاً من أن يزينوا لك الباطل.

الدكتورة / هبة عبد العزيز بغاغو مستشارة الموقع

منقول من موقع جامعة أون لاين