Pages

Saturday, May 31, 2008

الوقت



أنا النت عندي بايظ من كام يوم ولما بادخل النت بادخل من التليفون ، وما أقلكوش أد إيه النت بطئ وهو بالتليفون وعلشان أعمل حاجة باخد فيها وقت كبير أوي وقلت لو كنت عملت الحاجة دي وأنا باستخدم النت القديم كان زماني خلصت من زمان

جيه في بالي خاطر

زمان الناس كانت بتتحسر على الوقت اللي غيرها بتضيعه وكانت بتقول لو كان الوقت بيتباع كانوا يشتروا بكل الفلوس اللي معاهم الوقت اللي الناس بتضيعه

ده زمان لكن دلوقتي بقى عندنا خدمات كتير حوالينا وبنستخدمها وبنقدر إننا نشتري الوقت بالفلوس ومع ذلك بنضيع وقت كتير جدا ، في حين إننا لو حسينا بجد بقيمة الوقت وبالنعمة اللي إحنا فيها ماكنش هيكون ده الوضع

وأنا باقول لنفسي الكلام ده قبلكم ، بجد الوقت نعمة غالية أوي ربنا يعينا ونقدرها ونستخدمها في خدمة دينه

برضه متفائل



السلام عليكم ورحمة الله وبركاته

أنت تكون نازل تتمشى ، نفسك تشم هوا نضيف وتشوف منظر حلو - مش بيقولولك الخضرة والماء والوجه الحسن - فأنت نازل في الشارع مستمتع بالطبيعة ، ماشي بإنتعاش تيجي تاخد نفس عميق تلاقي جسم غريب بيدخل جوا النخاشيش تبص حواليك تلاقي واحد بيشرب سجاير والدخان مالي المكان ، تكح لك كحتين وتسيب المكان وتتمشى في مكان تاني ، لسه في تفاؤل وإصرار على مبدأ التمشية والإستمتاع، سرحان في ملكوت الله وبتتأمل في الطبيعة تسمع أصوات غريبة وكأن الحرب قامت جوا ودانك تلتفت تلاقي إتنين بيتخانقوا وبيشتموا بعض وكأنهم أعداء ، فتسيب المكان وتروح مكان تاني ، لسه في جواك أمل كبير إنك تستمتع بالطبيعة ، المهم وإنت ماشي قاعد بتفكر إنك عايز تبسط كل الناس اللي تعرفهم ، فبتفكر مثلا ممكن تجيب هدية لمامتك تسأل على زمايلك في الشغل تعزم أختك على الغداء وإذا بيك تشم ريحة ربنا ما يوريك تتخض وتبص تلاقي خرابة ماليانة زبالة ، تكتأب يا عيني
لكن لسه في إصرار على إنك متفائل ونازل من بيتكم علشان تتمشى ، قاعد بقى بتفكر في يوم الجمعة اللي جاية أصله يوم خطوبتك وبتفكر في البدلة اللي هتلبسها ويا ترى اليوم هيبقى عامل إزاي وإنت في الماشية الرومانسية دي فجأة تلاقي نفسك بقيت مش على نفس المستوى اللي الناس بتمشي عليه تلاقي نفسك في مستوى أقل شوية وتشم ريحة أقذر شوية من الريحة اللي شمتها وإنت بتتمشى ، ويا عيني تحس بوجع في جسمك كله ، وتسمع أصوات ناس بس بعييييييييييييييييييييدة عنك وفجأة تكتشف إيه سبب اللغز ده وهو إنك وقعت في بلاعة

وفي لحظة كل التفاؤل اللي كنت حاسس بيه ، والرومانسية اللي كنت عايش فيها تتحول ل .........................

نسيب النهاية مفتوحة ليكم وإنتم تقولوا يا ترى لو مكان الراجل ده إيه شعورك وإنت بتمر بكل المواقف دي وفي الآخر تقع في بلاعة :D

وإنت يا عيني نيتك سليمة ونازل تستمتع بالطبيعة