أكيد في ناس كتير سمعت مصطلح " فرانكو آراب " قبل كده وأكيد في ناس كتير بتستخدمه في حياتها
تعالوا معايا كده نعمل تجربة
كل واحد يفتح الماسنجر ويختار حد يكلمه
ويكتبله : هاو آر يو
آر يو فاين
ويكمله كتابه كده ويشوف رد فعل اللي بيكلمه ايه
يا إما هيضحك يا إما هيقول إيه اللي انت بتكتبه ده؟؟
من كام يوم كنت في ندوة وكان بيتعرض فيها فيديو الفيديو كان بالإنجليزي فكرت قلت طيب لو الفيديو ده كان بالعربي هل الناس هتتقبله ولا لأ ؟؟
المهم الفيديو اللي بعده كان بالعربي ما أكدبش عليكو جاللي إحساس بالقوة معرفش ليه حسيت ان الحروف العربية فيها قوة
باستغرب أوي لما ألاقي ناس بيكونوا سعيدين جدا إنهم بيتكلموا في كلامهم العادي بالإنجليزي ولو طلبت منهم يتكلموا عربي ياخدوا الموضوع بهزار وتريقة
للأسف أنا كنت واحده من الناس المبهورة باللغة الإنجليزية وده لأن المجتمع كان باني جوانا إن المتحضرين بس هما اللي بيتكلموا باللغة الإنجليزية
وده مش معناه اللي بيدرسوا اللغة الإنجليزية و يتقنوها ولكن معناه اللي بيتكلم عمال على بطال باللغة الإنجليزية وكأنها هي لغته أو كأنه بيتكلم مع أجانب
أخويه الكبير كان بيقولي إنه عايز يعمل حضانة لتعليم اللغة العربية بس أو بمعنى تاني تأسيس اللغة العربية عند الأطفال
وبعد كده اتفرجت على برنامج لدكتور إبراهيم الفقي وكان بيتكلم عن الإنتماء وأننا لازم ننتمي لأهلنا ووطنا وبلدنا وديننا ولغتنا
وقال اننا اوقات كتير بنكون عايزين نحسن اللغة الإنجليزية طيب ولغتنا احنا نهملها ونتركها
قبل رمضان كنت سمعت شريط عن الصيام فالمهم كان بيقول ان ربنا بيكرم اي حاجة ليها علاقة بالقرآن
يعني مثلا شهر رمضان أفضل الشهور – الأمة اللي نزل عليها القرآن " كنتم خير أمة " – الرسول الكريم اللي نزل عليه القرآن هو خير ولد آدم وسيد الخلق – الليلة التي نزل فيها القرآن خير ليله – واللغة التي نزل بها القرآن هي خير لغة في العالم هي لغة أهل الجنة اللغة العربية
وبعدين واحده صاحبتي كانت بتقرا كتاب مكتوب فيه ان اللغة اللي اسمها فرانكو آراب ديه لغة لا بتعلم اللغة العربية ولا الإنجليزية لغة كده بلا هوية
ولكني بعد مابهرت باللغة الإنجليزية وبدأت استعملها في حياتي زي مثلا أبعت رسايل اتكلم على الماسنجر وبعد ما اتعودت عليها وبقت ايدي واخده عليها ربنا كرمني بالمعاني الجميلة اللي في اللغة العربية قلت عيب أوي إني أكون عربية وباكتب وباتكلم بلغة تانية وحتى لو انا عايزة احسن الإنجليزي ما أهملش لغتي ده لازم الأولوية تكون للغة العربية اللي بإذن الله لو دخلت الجنة هاتكلم بيها إن شاء الله
يا جماعة الموضوع عايز ثقة في نفسنا وفي لغتنا لكن طول ما احنا مكسوفين من كلمة أو من مصطلح في لغتنا هنفضل طول عمرنا بنتعلم بالإنجليزي ونفكر بالإنجليزي ولسه ما خفي كان أعظم
تخيلوا معايا لو كل واحد بيقرا الموضوع ده بدأ ياخد على نفسه عهد إنه هيحيي لغته تاني وهينشر المعنى ده بين كل اللي يعرفهم وبدأ هو وصحابه انهم يفكروا في أفكار إبتكارية لنشر اللغة العربية ومش اللغة وبس ده اللغة العربية الفصحى
وأول خطوة نعملها إننا لما نتكلم مع حد على الماسنجر نتكلم بالعربي مش بالفرانكو آراب
واتمنى ان تكون المدونة ديه هي اللي بترعى أفكاركم أو تبعتولي على الميل ده
وكل أفكاركم هتنزل على المدونة بإذن الله علشان نتناقش فيها وهتلاقوا إن شاء الله أفكار وإقتراحات وتنفيذ بإذن الله
معا لنشر اللغة العربية
