Pages

Thursday, February 21, 2008

مجرد قلم وورقة


السلام عليكم ورحمة الله وبركاته
هاقولكم على مشكلتي بس محدش يتريق علي
أنا باحب الكتابة والرسم جدا بس مابعرفش أكتب ولا أرسم بس باحس بجد إن الكتابة ممكن تطلع حاجات كتير جوا الإنسان وممكن توصف حاجات كتير إنت شايفها وممكن توصل بيها رسالة
وكمان الرسم إنك تحس إنك بتبدع بمجرد ورقة وقلم شعور جميل
أنا نفسي حد يتبنى موهبتي المفقودة
:D
أول مرة أكتشف إن الكتابة والرسم فيهم حاجة مشتركة
إنهم مجرد قلم وورقة

كلمات خالدة

حاجة جديدة ... انطلقوا

إيه رأيكم نعمل حاجة جديدة
يعني إيه حاجة جديدة يعني هنخترع اختراع محدش اخترعه قبل كده ولا هنعمل ايه ما توضحي يا إنجي شوية
لا مش اختراع ولا حاجة ايه رأيكم لو بدأنا نعمل حاجة جديدة في حياتنا يعني كتير جدا مننا اللي عايش حياة روتينية تماما إيه رأيكم لو عملنا حاجة جديدة
زي إيه مثلا؟؟
هاقولكم زي إيه ... ممكن إننا نشوف أيام أجازتنا إيه سواء في الشغل أو في الدراسة ونحاول نبدأ في تأليف كتاب مثلا
أو نحاول إننا نتعود على عادة جديدة بس عادة سليمة زي مثلا أنا - وأنا بجد مخنوقة أوي من الموضوع ده - لما باكون في البيت بأقعد وقت كبير على الكمبيوتر أنا بجد تعبت نفسيا من الموضوع ده بقيت مدمنة الكمبيوتر وامبارح كان عندي مشوارين مهمين جدا ولغيتهم وقلت هاقعد مع اهلي وللاسف اغلب الوقت كان على الكمبيوتر
ممكن مثلا أيام الدراسة بين المحاضرات أجمع بنات والشباب يجمعوا شباب ونقعد نتكلم في أي حاجة نتكلم عن حياتنا نتكلم عن مستقبلنا نتكلم في ديننا
ايه تاني يا انجي ايه تاني
اه ممكن إننا نتفق مع صحابنا ونحاول نعمل حاجة في الكلية جديدة نسيب بيها ذكرى ويقولوا شوفوا المسلمين عملوا ايه
زي إيه مثلا هاقولكم بس دي مش تعتبر حاجة دي تعتبر مهارة نكتسبها إننا نكون واجهة لأي نشاط جديد مؤثر بمعنى إننا اللي نطلع نتكلم في المدرج نكلم الناس مثلا عن النشاط ده
وأحلى حاجة ممكن إننا نعملها إننا نكون قدوة للنااااااااااااااس كلها إزاي
يعني بالأخلاق وبالتعامل وبالمبادرة سواء في الدراسة او في الحياة و بالمظهر
واحنا بنتكلم معاهم نقولهم أد إيه إن النشاط ده بيفيد المسلمين كلهم

طيب وأبدأ إمتى في الموضوع ده أبدأ إمتى في إني أخرج من الصندوق وأعمل حاجة جديدة هأبدأ إمتى أكون مؤثر في الدنيا بأخلاقي وبتديني
إمتى أحاول إني أعمل حاجة تنفعني وتنفع المسلمين

كنت باتكلم مع واحدة صاحبتي وباقولها كلها كام سنة وكلنا بإذن الله هنتجوز طيب وهل انتي فاكرة اننا لما نتجوز هنقدر نعمل حاجة قلتلها انا شايفة الموضوع ده بعيني دلوقتي ما هو اخواتي متجوزين وبفضل الله رزقوا بأولاد ولكن هل بيقدروا يعملوا اللي كانوا بيعملوه قبل الزواج بنفس المجهود والوقت أكيد لأ
يبقى احنا دلوقتي نبذل أقصى جهد لينا لأنه لو قل بعدين هيكون مش قليل أوي لكن لو ما بدأناش دلوقتي وبدأنا بعدين فأظن إن الجهد هيكون قليل جدا

أبدأ ولو بكلمة فالعظماء صنعتهم كلمات