Pages

Tuesday, February 12, 2008

أول ثمرات النجاح...الحمد لله


السلام عليكم ورحمة الله وبركاته

أنا سعيدة جدا جدا جدا أنا حاسة بإنتصار حاسة إني ناجحة أوي
النهارده لقيت إستجابة ما كونتش متوقعاها لعمل بدأته
فاكرين لما كنت باقولكم على موضوع اللغة العربية
انتم ماتعرفوش انا بحب اللغة دي اد ايه

بأعتز بيها جدا أنا لو علي عايزة الناس كلها تتكلم عربي وتكتب عربي وتاكل عربي وتتنفس عربي وتنام وتحلم بالعربي

أما أقولكم على الموقف بقى
أفاجأ النهارده اني في اجتماع على النت والناس اللي في الاجتماع اغلب كتابتهم إنجليزي -على النت يعني- هما مصريين والله مش أجانب
أفاجأ بيهم بيكتبوا عربي واللي مش هيقدر انه يكتب بالعربي بيعتذر ومع ذلك برضه الناس اللي اعتذرت انها مش هتعرف تكتب عربي لأن الإنجليزي أسهلها أفاجأ انهم أغلب كتابتهم عربي
:D
أنا سعييييييييييييييييييييييييييييييييييدة جدا

ما أخبيش عليكم كنت حاسة بفخر كده وانا باكتب عربي النهارده في الاجتماع


الحمد لله يا ربي يا للي وفقتني ووقفت جنبي لحد ما شوفت حاجة زي كده قدامي

أجمل قصة حب


السلام عليكم ورحمة الله وبركاته
ازيكم يا جماعة؟؟
انا النهارده هاحكيلكم ان اجمل قصة حب ...
بس مش بين اتنين
لكن بين اربعة
وكمان كلهم بنات :D
لما تحس انك غالي أوي عند ناس ولما تحس ان مشاعرك بتهمهم ولما تكون محتاج تتكلم وتفضفض وتلاقي اللي بيسمعك
ولما تلاقي ناس بيسهروا علشان بيفكروا يعملوا ايه يبسطك يفكروا في هدية يجيبوهالك

وانا في سنة ثانية كنت لسه في بدايات معرفتي بأحلى صحبة
المهم كان وقتها حصلت مشكلة ما بينا وزعلت منهم
لقيتهم إذ فجأة كاتبين جواب جميل أوي وبيدهولي
حسيت أد إيه أنا غالية عندهم
أنا بحبهم أوي
وديه كلمات الجواب

إنجي دا انتي أجمل زهرة في بستان قلبنا
يوم ما تكوني في مرة زعلتي أو تغضبي مننا
مش هننام ولا حتى في مرة هنسامح نفسنا
دا إحنا أخوات في الله وإيماننا أقوى ما عندنا
عايزين نبني علاقة قوية تعيش جوانا لآخر الدهر
مش هنسيب الشيطان يدخل بينا طول العمر
ممكن تقبلي كلمة بسيطة تعبر عنا
ونقولك آسفين والله وإحنا في شدة ندمنا
وبلاش تخجلي وتقولي خلاص مش عايزة كلام
هنقولك اتنيلي ... هنبطل بس في الأحلام
بس هنطلب حاجة نونو وياريت مش ترفضيها
لما تحسي بزعلة كبيرة قوليها ومش تكتميها
لما تشيلي في قلبك حاجة امتى هييجي اليوم
اللي تفضفضي على اللي في قلبك من غير عتاب ولا لوم
لما تكوني في صحبة جميلة لازم تعرفي أكيد
إن الصراحة والفضفضة بجد شئ مفيد
بنحبك في الله والله وعمرنا ما هنستغنى
عن حبك يا قمرنا علشان نبقى بإذن الله في الجنة

يوم ما ادوني الجواب أنا ماكنتش عارفة أوصفلكم سعادتي ومعرفتش أنام وفضلت أقرأ الجواب أكتر من مرة واشكرهم وكنت طايرة من الفرحة
والصورة اللي فوق دي صورة الجواب
شايفين الرقة والجمال
ربنا يخلينا لبعض ويحفظنا
ما أرى فيكن إلا أخوات صالحات وصديقات صادقات
بارك الله في صداقتنا وجمعنا في الدنيا على حبه وطاعته
وفي الجنة في الفردوس الأعلى
إن شاء الله
قولوا آمين