بداية جديدة

النهاردة كان آخر يوم في إمتحانات في حياتي كلها

إحساس غريب أوي النهاردة حسيته لما سلمت ورقة الإمتحان للمراقب

حسيت إن حياتي كلها من أول ما دخلت المدرسة لحد آخر يوم في الإمتحانات مرت أدامي

دعيت ربنا أوي إنه يتقبل مني الفترة اللي فاتت ، ودعيت إني ما كنش قصرت في حاجة

وقلت له إني نفسي أكون فعلا سبت أثر وبصمة في الكلية

حسيت وقتها إن الدنيا بتمر فيا إما تمر برحمة وعزة وحب ونجاح يا إما تمر بذل وفشل وكره ومشاكل

وجالي إحساس تاني كنت فرحانة بيه في الأول لكن لما روحت واستريحت فكرت فيه وحسيت بقلق وخوف

حسيت إن زمان كان بيكون واجب علي إني أذاكر إني أروح المدرسة أروح الكلية كان دايما في عندي حاجة واخدة اغلب وقتي إسمها المذاكرة إسمها الكلية

لكن الفترة اللي جاية أنا اللي هاحدد كل حاجة في حياتي وأقول إيه اللي ياخد جزء كبير من وقتي وإيه لأ

حسيت إني هاكون صاحبة القرار في حياتي

أنا اللي هاقول أعمل إيه وما أعملش إيه

ربنا يوفقني ويعيني إني أعمل اللي يرضيه

وإن تكون حياتي له وحده