أضحك كركر

من طلب العلا يتفضل فى كابينه 4

اللى بيته من إزاز ميغيرش هدومه فى الصالون

فاقد الشىء يدور عليه

اقلب القدره على فومها الفول يقع منها

تأتى الرياح محملة بالأتربة

ياخبر النهاردة بفلوس بكره ينزل عليه أوكازيون

اللى معاه قرش محيره يجيب حمام ويحمره

قال يامحشحشين يكفيكوا شر الكمين

اللى ياكل لوحده يشبع

لاتبكى على اللبن فى البسكوت

اقطع عرق وحتة بتلو

اطبخى ياجاريه الأنبوبه فاضيه يا سيدى

لو حبيبك عسل ما تحطلوش طحينة

اللى يتلسع من الشوربه يتصل بالمطافى

وبكره ترجع ريما من عند خلتها فى مارينا

ياداخل بين البصله وقشرتها حط قطرة علشان هاتدمع من ريحتها

اصوم اصوم وافطر على المدفع

القرش الأبيض بيعوم فى البحر الأحمر

ضربوا الأعور على عينه قالهم كسرتوا النضاره

اللى ميشفش من الغربال يكشف نظر;

المال السايب يعلم الطلبة

نام وارتاح وكل عسل نحل التمساح

من خرج من داره مينساش يأخد المفتاح معاه

الباب اللى يجيجلك منه الريح شيله وركب قبنورى

المضطر يركب التاكسى

رب صدفة خير من ألف ليلة و ليلة

اللى يخاف من العفريت يعمل عبيط

المركب اللى فيها رايسين يلعبواطاولة

اللى خدتوا القرعه تخدوا ام الخلول

أكل العيش يحب الطعميه

طعم النجاح لو دقتوا مش هتصدقوا

أون سيراميك يعني على بلاطة النونو ده جميل أوي :D
واللي يعرفني هيشبه على النونو ده ويقول إنه شبهي بالظبط :D

المهم ندخل في موضوعنا

شعور جميل جدا لما تحس بنجاح ، سمعت أغنية جميلة أوي إسمها جدد حياتك فكان فيها جزء عجبني أوي بيقول طعم النجاح لو دقتوا مش هتصدقوا *** عايز تجرب حط حلم وحققه

بجد يا جماعة كلمة جميلة أوي

ناس بتفتكر إن راحتها وسعادتها وان ضميرها بيبقى مستريح لما بتعيش حياة عادية كل اللي بتعملوا انها بتصحى الصبح بتروح شغلها بترجع تنام بتقعد مع ولادها ، من غير اي دور مؤثر

مع إنهم لو بدأوا فعلا إنهم يحطوا حلم ويبدأوا فيه ، لو حاسوا إنهم بيتعبوا فعلا في الدنيا علشان هدف تفكيرهم هيختلف تماما

افتكرت حديث الرسول عليه الصلاة والسلام

"إذا قامت القيامة وفي يد أحدكم فسيلة فليغرسها"

إن أد إيه العمل مهم جدا حتى لو كان آخر لحظة مش في حياتك وبس لكن آخر لحظة في الحياة

ملحوظة : ممكن تسألوا إيه العلاقة بين الصورة دي والكلام اللي كاتباه ، بصراحة لما شفت الصورة دي والنونو ماسك الوردة افتكرت الحديث الكريم

إحساس أكثر من رائع

إحساس أكثر من رائع
أن تمد يدك فتجد من يصافحك ... بحب
وتفتح قلبك فتجد من ينصت إليك ... بصدق
وتصرخ فتجد من يستقبل صرختك ... بإخلاص
وتبكي فتجد من يجمع حبات دموعك ... بوفاء
فالصداقة كالقناعة كلاهما كنز لا يفنى
بشرط أن لا تكون العملة مزيفة

يا صديقي مد إيدك

السلام عليكم ورحمة الله وبركاته

بقالي فترة باسمع حاجة وما تتخيلوش مضايقاني أد إيه
من أكتر من شخص باسمع إنهم كانوا أيام الدراسة علاقتهم بصحابهم كانت قوية جدا ولما اتخرجوا ما باقوش بيعرفوا حاجة عن بعض ولو حتى بالتليفون

النهاردة كنت باكلم واحده كانت معانا في الكلية واتخرجت من سنتين باسألها عن واحدة كانت صاحبتها أوي بتقولي إنها بقالها فترة ما تعرفش عنها حاجة أنا بجد صعقت وقلت إزاي عشرة 4 سنين تضيع كده ، ومش أي عشرة ، دي صداقة يعني رباط قوي

هل ده واقع ، هل بعد الدراسة الناس ما بتعرفش بعض ، هل ده بسبب المشاغل ولا لإنهم لقوا حاجات تانية أهم ، زي الزواج أو الشغل أو أو أو

بجد باتمنى إن الدراسة ما تخلصش علشان يكون في ود وتواصل ما بيني وبين صحابي :((

يا رب اربط بينا برباط الإسلام والحب ، يا رب ما تفرقناش أبدا

جمال مصرنا في إيدينا

بنعيب كتير في النظام ، ومش عاجبانا السلطة في مصر
ومتهيألنا لو النظام إتغير إن مصر هتكون أحسن
وللأسف إحنا مش مدركين إن المشكلة فينا إحنا ، وإن كمان الحل مش هيطلع غير مننا

في شعر بيقول
نعيب زماننا والعيب فينا وما لزماننا عيب سوانا

وفي مقولة كنت سمعتها بتقول
إن كنتم تريدون أميرا مثل أبو بكر فكونوا مثل خالد وعمر

إمبارح كنت باكلم واحده صاحبتي فباكلمها على بلال دياب اللي كلم د.نظيف في مؤتمر جامعة القاهرة

بتقولي أنا في حالي وماليش دعوة بالسياسة

مين فينا كده ، وكام واحد بيقول أنا عايز أعيش وأربي ولادي
وهو مش عارف إنه بكده بيظلم ولاده قبل ما يظلم نفسه

أنا مش باقول إننا نعمل ثورة ونقلب نظام الحكم
أنا كل اللي باقوله إننا نبدأ من نفسنا ثم من اللي حوالينا ، نصنع حياة جميلة في المنطقة المحيطة بينا
باقول إننا نتميز في مجالنا ، باقول إننا ندي الناس من غير ما ناخد ، باقول إننا نحب بعض ونسامح بعض

أنا باقول إننا نكون مثل خالد بن الوليد وعمر بن الخطاب

وصدقوني لو كلنا عملنا كده مصرنا هتكون جنة

هنرجع أقوياء تاني

عيش حياتك بإستمتاع وبحب وبإسلام :)