Pages

Tuesday, May 27, 2008

نعناع الجنينة


إحنا عندنا أرض بنزرع فيها فاكهة وخضار ومربيين فيها معيز - لا مؤاخذة يعني - بغض النظر إن كل شوية معزة تموت بس لسه فاضلنا كام معزة كده

خلينا ندخل في المفيد ، بابا كل ما كان بيروح هناك كان يجيب لنا معاه حاجات منها ، أوقات كان بيجيب مانجة وخوخ وقصب وبصل وحاجات كده يعني ، لما كنا بناكل الحاجات دي كان بيبقى فرق شاسع في طعمها وطعم الفاكهة والخضار اللي موجودين في السوق

معرفش ليه حسيت إننا لما يكون في إيدينا مورد ونقدر إننا نستغله ده بيكون أفضل بكتير من إننا نكون مضطريين إننا نستغل موارد الآخرين

ومش لازم يكون عندنا أرض علشان نقول إحنا نقدر نزرع أكلنا ، لكن شوف إنت في إيديك إيه ، وأكيد كل واحد فينا فيه في إيده حاجة وهو مش شايفها ، دوروا كويس بس ، يعني مثلا إحنا كنا زارعين نعناع في البلكونة في بيتنا وكان رائع وسهل جدا

فشوفوا إنتم ممكن تعملوا إيه ولو حاجة بسيطة بس أكيد هتحس بفرق بعدها لإن الحاجة دي إنت اللي عملتها

إنتم طبعا عارفين أزمة العيش ، وإن الناس بتقف بالطوابير علشان تاخد كام رغيف

مرة كنت أنا وبابا في مشوار فشوفنا راجل شايل كذا رغيف عيش وماشي بيهم قبل شارع السودان بشوية ، فبابا بيقولي الراجل ده جايب العيش ده منين ، ده مفيش أفران قريبة من هنا ، قلتله تلاقيه راح الفرن اللي جنبهم ومعرفش يشتري فراح أي فرن بعيد

قلتله إحنا حلنا إننا نخبز العيش في بيوتنا بدل ما نكون دايما تحت رحمة أصحاب الأفران ، بابا قاللي دي سهلة جدا إحنا كل اللي عايزينه فرن وعجينة :D

أنا عجبتني أوي الفكرة وحسيت إني مادام في قوة وصحة وعلم يكفيني إني أنتج أكلي بنفسي فليه أحتاج لغيري

وده مش على الأكل وبس ده في كل حاجة في حياتنا ، لما يكون عندك سلاح العلم وتستغله صح وتطوره هنكون أحسن بكتير من إننا نحتاج للآخرين اللي عندهم العلم ده ، زي مثلا دول الغرب ، إحنا بإيدينا إننا نتميز في مجالات كتير أوي وبإيدينا إننا نرجع أمجادنا وبإيدينا إننا نكون أوائل

بس كل اللي محتاجينه إننا نقتنع إني صاحب رسالة وإن النصر والعزة هيبدأوا من عندي أو على الأقل أكون من اللي بيشاركوا فيه ونقتنع كمان إني لو في مكان ومش هاكون متميزة فيه يبقى أشوف أنا أقدر أكون متميزة فين وأروح المكان ده بس لازم التميز

دايما مقتنعة ، أنا مش هاضيع 4 سنين من عمري في الكلية علشان بعد كده أقعد أدام جهاز كمبيوتر زيي زي أي حد خريج كلية حاسبات ومعلومات أنا لو ده فعلا مجالي يبقى لازم أكون رقم 1 في كل حاجة فيه لو حاسة إنه مش مجالي يبقى آخد منه اللي يفيدني في المجال اللي أنا بحبه


وخليكم فاكرين إن نعناع جنينتنا أحلى بكتير من نعناع جنينتهم :D

أحبكم في الله