قولولي هل فكرتم؟

السلام عليكم ورحمة الله و بركاته

قولولي يا جماعة ... هل حد فيكم فكر هو شايف بيته عايز يبنيه إزاي
يعني " غير المتزوجين " هل فكرتم عايزين بيتكم تبنوه إزاي؟
حلمت مرة بشكل البيت يعني ألوان الحيطان ، عدد الحجرات
هل فكرت العفش هتيجبه منين؟
هل فكرت في أسماء أولادك؟
هل فكرت هتوديهم مدارس إيه؟
هل فكرت في شريك أو شريكة حياتك ؟ ما هي صفاته
هل أهلت نفسك أن تتحمل مسؤولية بيت وأسرة؟
هل رسمت لحياتك حياة تحلم أن تحولها لواقع
هل فكرت إيه الأساس اللي عايز تبنيه عند أولادك

أنا مثلا ناوية إن شاء الله بعد ما أخلص كليتي أروح أتدرب في كلية رياض أطفال إن شاء الله

أوقات بافكر بالاقي إن الحياة اللي بعد الزواج هي دي الحياة اللي ممكن أرسمها على مزاجي
بمعنى أنا في بيت أهلي - ربنا يحفظهم ويخليهم يا رب - عايشة في بيت مش أنا اللي اختارته أودتي مش أنا اللي مختاراها من وأنا صغيرة ودي أودتي
كنا بنبيض شقتنا من فترة وأنا مصرة على لون معين وبرضه بابا وماما عملوا اللون اللي هما عايزينه
لكن في بيتك دي فرصة إنك ترسم صورة وتحققها كمان ، ما تضيعوش الفرصة دي من إيدكم

هاحكيلكم حكاية واحد رسم لبيته حياة وعاشها زي ما هو عايز بالظبط

هو عشق الله وعشق الإسلام وقرر أن يتحول بيته لجزء من حياة الصحابة
أولاده أسماؤهم : البنات ... خليدة وأمامة وسنينة وسراء ونسيبة ورفيدة
الأولاد ... خلاد وأويس وأبي
هذا الرجل عشق اللغة العربية كان يتحدث معهم في البيت باللغة العربية الفصحى
وقت مذاكرتهم كان يقول لهم " أحبوا العلم " وكأن لديك ضيف وتريد أن تشوقه لأكله مثلا
عندما كان يرى أي عطل في المنزل " كهرباء مثلا " كان يقول أحب الإصلاح وكان يقصد إصلاح العطل وإصلاح كل فاسد حوله ومنها إصلاح لقلوب أولاده
عند زواج كل بنت من بناته كان يحضر لهم هدية من ضمن الهدايا طقم فضة ومكتوب عليها وصايا
ونفس الكلام مع أخواتها واحده أهداها رخام ومكتوب عليها أيضا وواحده حافر لها على خشب

كان في أعياد ميلادهم كان يحضر لكل منهم كارت مكتوب عليه أبيات من الشعر

لا يخرج من بيته إلا ومعه كتيبات ومطويات ليوزعها على إخوانه
كان أحب أوقاته عندما يسأله أحد عن الصلاة أو القرآن

كان دكتور وكان يعمل في تخصص يخدم دعوته للإسلام

هذا الرجل توفي يوم الخميس الماضي ... قبل أن يتوفي كان مريض مرض شديد كأن الله يريد أن يضعه في مكانة كبيرة
وبعد وفاته أحد معارفه رأى له رؤية أنه في إختبار وحصل على الدرجة النهائية

أختي راحت العزاء يوم السبت اللي فات بتقولي بنته بتقابلها بإبتسامة غريبة جدا وبتقولها البيت نازل عليه سكينة وطمأنينة من وقت وفاة أبيهم

أنا معرفش تفاصيل من حياتهم بس ده اللي اتحكالي

ربنا يغفر له ويحشره مع الحبيب المصطفى ويرضى عنا ويعزنا ويجعلنا خدام لدينه

شوفتوا يا جماعة ده راجل رسم حياة جميلة وكان قائدها ومعاه زوجة أعانته على تحقيق حلمه وأولادهم ناس تفخر بيهم أمم
كونوا فريق رائع هم زخرا للإسلام

فكروا وأبدعوا وإرسموا حياتكم عايزينها إزاي