شكر وتقدير - 1

السلام عليكم ورحمة الله وبركاته

وأنا في الثانوي ما كنتش بافكر أنا عايزة أدخل كلية ايه وطبعا ديه مشكلة كبيرة جدا يعني أنا دلوقتي كنت باتمنى ادخل كلية تانية غير اللي انا فيها دلوقتي بصراحة كان نفسي ادخل كلية رياض أطفال
:D
المهم وانا في ثانوي كان عندي هدف تاني خالص عايزة ادخل علشانه الكلية
كان هدفي اني لما ادخل الكلية الاقي صديقات يعينوني بجد اننا نعبد ربنا بما يرضيه بغض النظر ده هالاقيه في انهي كلية انا ماكنش فارق معايا الكلية على اد ما كان فارق معايا الصديقات

واللي خلاني اكتب الكلام ده اني النهارده افتكرتهم كلهم وافتكرت اد ايه كليتي أثرت فيا تأثير إيجابي بشكل كبير جدا واتعلمت منها حاجات كتير جدا
حسيت ان شخصيتي اتغيرت في تفكيري وتعاملي مع الناس وعرفت من الكلية ديه معاني جميلة اوي وعرفت اهم شئ في الدنيا ان لما الواحد بيلجأ لله ربنا بيعينه اوي وعرفت كمان ان الصديق الصالح بيرفع الإنسان من سابع أرض لسابع سماء
حسيت النهارده اني بحب كل الناس واني محبوبة من كل الناس حاسة براحة كبيرة اوي جوايا ونفسي والله اشكر كل انسان حسيت منه ولو للحظة اني مقامي عنده كبير
افتكرت النهارده ايام ماكنت باروح الكلية ونهزر ونرخم على بعض
الكلية ديه شافت مننا ايام بجد انا دلوقتي وانا قاعدة في اودتي لوحدي بعيد عن صحابي حاسة اد ايه ان كليتي ديه عظيمة لانها بتجمعنا ببعض
حاسة ان الكلية كلها هي بيتي التاني وان كل اللي فيها اخواتي وان الدكاترة والمعيدين والطلبة والعمال والموظفين دول عيلتي
خلاصة القول اني من غير صحابي انا صفر على الشمال
وزي ما الكلية طلعت عنينا بس بإذن الله لسه هاتعلم منها كتير وكتير وكتير
وما اقدرش انكر فضلها عليا ابدا وفضل كل انسان اتعلمت منه حاجة