هو ولد وهي بنت وكل واحد في حاله أحسن

السلام عليكم

النهاردة كتبت رد على منتدى ، وأنا باكتبه وبعد ما كتبته كنت بافكر هل اللي أنا باعمله ده صح ولا غلط ؟

وكنت مقتنعة تماما إني ما عملتش حاجة غلط ، وإني كنت باتكلم بكل أدب وكلمتين ورد غطاهم بس كنت حاسة إنهم ممكن يأثروا في أي حد يقراهم

بس لحد هنا الموضوع مش خلص ، بعد شوية افتكرت الكلام اللي كنت باقوله للناس ، إن في حاجات بسيطة ممكن تؤدي في النهاية لحاجات كبيرة

وإن العلاقة بين الشباب والبنات ما ينفعش تكون إلا في حدود وفي الضرورة وبس ، وقلت طيب اللي أنا عملته ده كان صح ولا غلط ؟

المنتديات بصفة عامة عبارة عن مكان بيكون فيه مجموعة من الناس وبيتكلموا في أمور في الحياة وقد يتطرقوا لأمور شخصية وده طبعا اللي مش مسموح به أبدا

حسيت إني من الناس اللي باقدر بفضل الله أتحكم في نفسي وإني لما ألاقي في حاجة غلط بتحصل بافرمل وأرجع

حسيت إن في أكتر من حاجة بتأثر في الأمور دي

أولها إن طبيعي جدا إن أي حد لما بيتعامل مع أي شخص ، في الأول بتكون الأمور رسمي وبيكون في حدود بس مع مرور الوقت الناس بتاخد على بعض وفي حدود كتير جدا بتقع وده أكيد مش صح وعواقبه سيئة جدا

تاني حاجة إن لازم يكون في رقابة ، داخلية من جوا الإنسان يقيس بيها إذا كان هو صح ولا غلط ، ورقابة خارجية متمثلة في الله عز وجل يستشعر إنه معاه وشايفه فده هيخلي الإنسان يستحي من ربه وتاني حاجة صحبة صالحة تقومه وتعينه

لو أدركنا معنى وجودنا في هذه الدنيا ، لأدركنا أنها عالم جميل بطاعة الله والقرب منه :)

جزاكم الله خيرا