واحد اتنين

إحنا كلنا بنفضل الجزء العملي أكتر من الجزء النظري ، يعني لما بندرس في كلية بنحب إننا نطبق اللي بناخده بصورة عملية
لما بيكون مطلوب مننا نذاكر جزء معين بنحاول نخزنه في عقلنا بصورة تخلينا ما ننساش اللي قريناه

والموضوع ده بيتنفذ بأكتر من طريقة ، يعني ممكن مثلا نحول درس معين لرسمه كبيرة و نحطها على الحيطة في أوضتنا أو تحت زجاج المكتب علشان كل مانشوفها نفتكر الدرس بسرعة

وممكن إننا نكرر الكلام أكتر من مرة علشان نحفظه

ده وإحنا كبار كده وقربنا نتخرج ، طيب والأطفال الصغيرين اللي لسه بيتعلموا أ ب أو واحد اتنين

يا ترى الأطفال دي هتوصلهم المعلومة إزاي ، ممكن إننا نمثلهم درس في العربي مثلا علشان يفتكروه

ممكن نغينلهم أغنيه في الإنجليزي علشان تثبت

ممكن نجيبلهم مكعبات يتعلموا عليها الحساب

كل دي حاجات ممكنة ولطيفة وهتوصل للأطفال المعلومة بسرعة وبطريقة تجذبهم إن شاء الله

لكن اللي بيختلف هو طريقة تنفيذ الحلول دي

يعني خلوني أفكركم بأغنية كانت بتتقال للأطفال علشان يحفظوا بيها الأرقام

الأغنية بتقول

واحد ... اتنين ..... على و حسين
تلاتة ... اربعة ..... فى المطبعة
خمسة ... سته ..... قفلوا السكة
سبعة ... تمانيه ..... طبخوا البامية
تسعة ... عشرة ..... دشوا البصلة !!!


ممكن يكون كتير مننا سمع الأغنية دي قبل كده

وممكن تكون وصلت لهدفها بإمتياز وإن الأطفال فعلا حفظوا الأرقام دي

وجزاهم الله خيرا إنهم فكروا وعملوا أغنية تجذب الأطفال

لكن من رأيي إنه من الأفضل لو الأغنية إتقدمت بس جواها معلومة مفيدة

إنتم عارفين في قناة جديدة إسمها طيور الجنة بتجيب أغاني أطفال رائعة وأكتر من رائعة كمان

وبتجذب الأطفال جدا وجواها معاني وقيم غالية جدا

لو عايزين فعلا نقدم للأطفال حاجة تجذبهم يبقى نحط لهم جوا الحاجة اللي تجذبهم حاجة تنمي عقولهم وترسخ إيمانهم وعقيدتهم