أنا مسلمة

كان يا ماكان في قديم الزمان وما يحلى الكلام إلا بذكر النبي عليه الصلاة والسلام

كان في بنت جميلة إسمها ندى

اتولدت في بيت جميل مع أب رحيم وأم حنونة

أتولدت وهي بتشرب حب الإسلام ، قرأت كتير عنه

حبته لدرجة إنها كانت بتعشق اليوم المخصص لذهابها المسجد وكانت بتحلم باليوم اللي تبقى فيه مكان معلماتها

عرفت يعني إيه يكون عندها صحبة ما اجتمعوا إلا لله

قرأت كتير عن الإسلام و عن فضل سورة البقرة وسورة آل عمران

وكانت شايفة إن ده حلم مستحيل بالنسبة لها ، كانت شايفة إنهم سورتين عظيمتين جدا وكانت تتمنى إنها تحفظهم

وفجأة وبدون مقدمات حفظتهم ومش كده وبس دي ختمت كمان المصحف

ما كانتش بتضيع أي فرصة ولو صغيرة علشان تتعلم فيها

كانت كل حياتها حب لله سبحانه وتعالى، ماكانتش بتستنى حاجة من حد

كان كل أملها في الدنيا إنها تحب ربنا ، إنه يرضى عنها

كانت بتحب الناس كلها ، كان حلمها في الدنيا إنها تخرج جيل صالح يعبد ربنا وينصر دينه

وفعلا جيه اليوم اللي جالها الفارس اللي هيكمل معاها حلمها

عاهدوا ربنا إنهم يكملوا الحلم ده و اتعلموا ازاي يربوا ولادهم تربية صالحة ، قرأوا أكتر وأكتر عن الإسلام وعن سيرة الرسول عليه الصلاة والسلام

اتعلموا ازاي الرسول الكريم والصحابة كانوا بيربوا ولادهم ويشربوهم حب الإسلام

اتعلمت إزاي تخلي بيتها جنة وولادها هما طيور الجنة :)

حبت الناس ونشرت دين ربنا ، أخلاقها كانت أخلاق الإسلام

أدبها كان بيتكلم عنها

كانت من المتميزين في المجال ده

وكان كل الناس بتحب تيجي عندها وتشوف جنتها ، الناس لما كانت مهمومة كانت بتجيلها لما بتكون مبسوطة دي أول واحده بيفكروا فيها تشاركهم فرحهم

كانوا بيتعلموا منها إزاي تعيش في الدنيا في جنة

وقبل ما تقابل ربها الكريم افتكرت كل أيامها ، وافتكرت أد إيه هي عاشت حياة جميلة

وفرحت أوي لما حلمها اتحقق

لأن كان شعارها

أنا مسلمة

وفرحت أكتر لما ربنا أختارها علشان تروح له