من الحضانة للكلية

السلام عليكم ورحمة الله وبركاته

النهارده افتكرت أول يوم دخلت فيه المدرسة
بجد اليوم ده أنا عمري ما هانساه أبدا
كان سنة 1993 يعني من 15 سنة
كان عندي 5 سنين
دخلت وأنا مش عارفة أي حاجة في أي حاجة ، اليوم الجميل ده بقى زي كل الطلبة الملتزمين أنا ما دخلتش الفصل وقعدت مع الدادا وهاتك يا عياط وأقولها أنا عايزة ماما وتقولي ماما بس طلعت تعمل حاجة وجاية على طول ، " على طول بتاعتهم دي كانت حوالي 6 ساعات "

والبنات طلعت من الفصل كانت بتغيظني وتقولي شوفتي إحنا خدنا إيه

المهم ده كله يهون في مقابل اللي حصل لي لما روحت البيت :D

زي ما انتم عارفين إني كنت بنت مؤدبة جدا وملتزمة في المدرسة زي ما قلتلكم فوق كده بالظبط ، أول ما روحت بابا كان هيديني حتة علقة ما خدهاش ---- في -----
كملوا انتم بقى ، بس الحمد لله ماما حاشت عني :D

بس يا سيدي ومن يومها وأنا بدأت المشوار اللي لسه فيه لغاية دلوقتي

دخلت إبتدائي وإعدادي وثانوي وكلهم ما يختلفوش عن الحضانة في حاجة يعني يادوب انت تحط رجلك في الحضانة وتلاقي كل السنين بتمر هوا

المهم جت المرحلة الكبيرة والأخيرة ... تاتاتاتا الجامعة
دخلت وأنا معرفش أي حاجة في الكلية ، لقيت ناس كتير ، حياة جديدة داخلة عليها
ده كان سنة 2005 ، ركزت كده شوية لقيت إننا بقينا في 2008 يعني بقالي 3 سنين في الكلية

فاكرة يا إنجي لما دخلتي وأول يوم ما كانش عندك محاضر غير الساعة 2 فاكرة لما قعدتي إتكلمتي مع ناس من سنة رابعة وكان نفسك تكوني زيهم كده وعندك خبرة وبتساعدي الناس فاكرة لما كنتي بتكتشفي الكلية
دلوقتي إنتي خلاص فاضلك شهر في التيرم ده وبعدين سنة رابعة اللي هي اخر سنة في الكلية إنتي داخلة على مشروع تخرج

وبعدين بقى حياة تانية خالص

حياة ما بعد التخرج ، هل هاتجوز وهاقعد في البيت ، هل هاشتغل ، هل هاكمل أحلامي التي كنت أحلم بتحقيقها
هل سأكون أكثر تفرغا أم مشاغل الحياة بعد الدراسة أكتر بكتير من وقت الدراسة

يعني ممكن قولي كام سنة كده وبنتي تكون في نفس الموقف اللي كنت فيه لما دخلت المدرسة وأكون أنا في مكان ماما اللي راحت وجاية على طول :D

تخيلوا ...أنا حاسة إن أول يوم لي في المدرسة كأنه كان إمبارح الأيام بتعدي بسرعة جدا هو العمر فيه كام 20 سنة يعني علشان نقول لسه بدري

طيب والعشرين سنة اللي فاتوا هيعدوا عادي كده ؟؟ قبل ما أفكر أنا هاعمل إيه لو ربنا كاتب لي عمر لازم أشوف أنا عملت إيه في العمر اللي فات

دلوقتي وأنا عمري 20 سنة لازم أقف وأشوف العشرين سنة دول عملت فيهم إيه لازم أشوف الدقيقة اللي جاية هاعمل فيها

لازم أحاسب نفسي قبل ما ييجي يوم ورب العالمين يحاسبني