Pages

Thursday, January 24, 2008

خاطرة

السلام عليكم ورحمة الله وبركاته

انا عندي خاطرة وباطلب من اي حد يقرا الموضوع ده يرد علي

كتير بنسمع اننا لازم يبقى لنا دور في الحياة وفي نصرة الاسلام
في حاجة بفضل الله باعملها ممكن تكونوا بتحسوا انها صغيرة لكن انا كل ما اعملها بحس بفخر شديد وعزة واحس ان النصر هييجي من هنا

ايه هي الحاجة ديه بقى:
انتم عارفين احساس وحش اوي كل ما احس بالحال اللي المسلمين وصلولها وان احنا بقينا بنتذل اوي
الغرب بقى مأثر علينا في أفكارنا وعلمنا وفي بلدنا وفي ابسط شيء نمتلكه في لغتنا

ومن يومها خدت قرار اني مش هاتخلى ابدا عن لغتي واني هاعتز بيها واي رسالة هابعتها هتبقى بالعربي وكلامي على قدر المستطاع هيكون كله عربي
معرفش ليه بحس اوي اني باعمل حاجة كبيرة اوي لما باكتب رسالة بالعربي
باحس ان اللغة العربية ديه كبيرة اوي واني بفضل الله ربنا جعلني انا الأمة الفقيرة استخدمها
باحس اد ايه اللغة العربية نعمة كبيرة اوي واني نلت شرف عظيم اوي اني اكتب او اتكلم باللغة العربية
باحس اني باقول للغرب انتم ما أثرتوش علي انا قوية انا منتمية للغتي اللي هي اعظم لغة في العالم لغة القرآن لغة النبي لغة أهل الجنة
لغة الإسلام
باحس اني باقولهم انا عربية وبافتخر اني عربية ومش هاندمج وسط عالمكم ومش هاكون جزء منكم ولا هاكون صورة منكم
انا كيان مستقل ينتمي لأمة اللغة العربية
ممكن تقولوا يعني بالرسائل اللي بتبعتيها بالعربي هي اللي هتفرق
هاقولكم على الاقل بتفرق معايا وانا باحاول بفضل الله اخليها تفرق مع كل المسلمين

ديه كانت خاطرة بتجيلي وعايزة نتناقش في موضوع اللغة العربية لاننا لازم يكون لينا دور في نشر اللغة تاني وسط الناس
معا لنشر اللغة العربية

5 comments:

آيـــ الله ـات said...

أنا كمان عندي خاطرة في الموضوع دا ...
أنا و هاجر مرة قعدنا في الكلية .. فقلت لها تيجي نتكلم لغة عربية فصحى ... قالت لي ماشي ..
المهم قعدنا حوالي ربع ساعة نتكلم باللغة العربية الفصحى على غرار .. لقد نزلتُ السٌلم الآن .. هل ستأتين معي .. فترد علي: نعم يا حنظلة ..
وقعدنا نضحك على كلامنا دا .. و في الآخر قلنا لنفسنا .. هو إحنا بنضحك ليه ؟؟
إحنا بنضحك على لغتنا العربية .. لغة القرآن .. لغة إسلامنا ..
فزعلنا من نفسنا أوى إننا بنضحك على لغتنا .. على الرغم لما حد بيتكلم بالإنجليزي أدامنا .. بنحترمه و نقول يااااااااااااه يا ريتنا كنا زيه
أنا ما باقولش ما نتعلمش لغات تانية أكيد .. إحنا نتعلم براحتنا .. بس استخدامنا يكون لإيه ؟؟
جزاك الله خيرا على فكرة اننا نستخدم الحروف العربي في كلامنا و خاصة على النت .. أعتقد من السخف إننا نلاقي إن اللغة العربية أقل نسبة من اللغات مكتوبة دلوقتي على النت ..
ربنا يهدينا جميعا
وجزاك الله خيرا مرة تانية

Anonymous said...

فكرتك جميله, أستمرى عليها

Enjy Badran said...

السلام عليكم ورحمة الله وبركاته
انتم عارفين في موضوع اللغة العربية معرفش ليه باحس اننا بنستلف حاجة مش عندنا باحس اننا معندناش لغة علشان كده بنتكلم بلغتهم

Yasmen Refaat said...

ايات : انتوا كنتوا بتضحكوا علي طريقتكوا مش على اللغة!!!

بجد يا انجي حماسك رائع و ادراكك لمشكله زي دي جامد جدا

خالي بالك بس لحسن الحماس يقلب بعصبيه

وبجد جازاكي الله خيرا علي الفكرة

Enjy Badran said...

جزاكي الله خيرا يا ياسمين على النصيحة