خير الخطائين

السلام عليكم ورحمة الله وبركاته

أوقات كتير لما بنغلط الناس بيعلقولنا المشانق ويحسسونا إننا خلاص مش نافعين

وإننا إزاي نعمل كده ونلاقي الناس بتنظر لينا نظرة المتهم

في حين إننا بنكون محتاجين حد يطبطب وحد ياخد بإيدينا وحد يعيننا

لو حسينا ولو حسسنا الشخص ده إنه أسوأ إنسان في البشرية يبقى إحنا كده بنظلمه وممكن نقضي عليه

مع إن الناس كلها كلها فيها أمل وفيها خير بس إزاي إننا نستغل الخير ده

ولو حد أخطأ فكلنا خطائين وخير الخطائين التوابون

بصوا دايما للناس إنهم من عند الله عز وجل وإن أكيد فيهم حاجات جميلة كتير

ومن يتق الله يجعل له مخرجا ويرزقه من حيث لا يحتسب

لما الواحد بيعصي ربنا ، وبعدين يزهق من المعاصي ويشتاق لربنا وإنه يبدأ حياة جديدة بجد

عايز يرضي ربنا ، لكن مقتنع إقتناع تام إن ربنا مش هيقبله أو إنه مش بيحبه ، أنا مش مع الكلام ده تماما

لإن ربنا سبحانه وتعالى بيحب كل الناس

ربنا سبحانه وتعالى قال لسيدنا موسى

اذهبا إلى فرعون إنه طغى فقولا له قولا لينا لعله يتذكر أو يخشى

ما بالكم بمن يعادي الله عز وجل والله سبحانه وتعالى يتودد إليه ويأمر سيدنا موسى أن يخاطبه باللين فما بالكم بمن يريد الإقبال على الله عز وجل

النهاردة اتفرجت على برنامج خدعوك فقالوا لمصطفى حسني

ما شاء الله برنامج أكتر من رائع وخصوصا لما تلاقي اللي بيتكلم في حاجة بيتكلم فيها وهو متمكن فيها وتحس فعلا إنه دارس وفاهم كويس ما شاء الله

المهم كان بيقول قول الله تبارك وتعالى ، ومن يتق الله يجعل له مخرجا ويرزقه من حيث لا يحتسب

بجد الآية دي جت في وقتها ، حسيت إني بادخل نفسي في مشاكل كتير وعايزة أخرج منها ، وباقول غلط اللي أنا باعمله ده

فلما سمعت الآية دي حسيت إن في حاجة مهمة أوي كانت غايبة عني

هي التوكل على الله وإننا نتقي الله عز وجل

بجد كلمة يا رب بتفرق أوي أوي أوي

قد نمر بمواقف تكشف لنا جوانب خفية في شخصيتنا

:) ما تزعلش لعل المشكلة دي خير

أوقات بنحس إننا لما نقع في مشكلة أو لما نحس بضيق في الرزق أو لما نكون أوقات إمتحانات ونتمنى إن ربنا يعدي المشكلة دي وإن فترة الإمتحانات دي تعدي

وبنقعد ندعي يا رب عدي المشكلة دي على خير

ونفضل مضايقين أوي إن المشكلة دي موجودة في حياتنا

ولما المشكلة تعدي على خير ، في بعضنا بيرجع يبعد عن ربنا أو تاخده الدنيا

لكن في ناس بتتمنى إن حياتها كلها تكون إبتلاءات علشان تفضل قريبة من ربنا

بجد يا جماعة لما تحصل لنا مشكلة مش نشيل هموم الدنيا ، لعل المشكلة دي خير ، ولعلها تكون سبب في قربنا من ربنا سبحانه وتعالى

دي مش دعوة إننا نطلب من ربنا إننا نقع في مشاكل أو إنه يبتلينا ، لأ طبعا دا إحنا بندعي ربنا بالعفو والعافية وإنه يرزقنا الإخلاص

لكن ما تنسوش إن الحسنات يذهبن السيئات

يعني لو حد عايز ربنا يبتليه علشان يطهره من الذنوب ، ما يدعيش يا رب إبتليني لكن يحاول إنه يعمل حسنات تذهب السيئات ولو ربنا كاتب له إنه هيبتليه يبقى هيبتليه

ربنا يرزقنا جميعا الإخلاص وحسن العمل

كيف تتفجر الإرادة بداخلنا؟

الإرادة تكمن بداخلنا، وأحياناً تكون خافتة، ثم نبدأ في تنميتها، فتتحول أنت نفسك، بنفس حجمك وإمكانياتك لطاقة هائلة غير عادية وهذا ما فعله المسلمون لأجيال كثيرة.

إرادة غير عادية تفجرت بداخلهم، أدت إلى تحقيق إنجازات فوق الخيال، فجيوش المسلمين حين تقارنها بجيوش أعداء المسلمين المتفوقة علينا عدداً وعدة.

وكل إنسان منا قادر على تفجير إرادته لتنتشر وتدخل مسام جسمه وكيانه وخلاياه.

من عجائب النفس البشرية أن الله سبحانه هو الذي أودع الإرادة فيها. فنحن جميعاً جئنا من آدم الذي قال عنه المولى سبحانه: (ونفخت فيه من روحي). ما الفرق إذن؟

الفرق في قدرة الإنسان على استخراجها من الأعماق، والنبي محمد صلى الله عليه وسلم قال: إننا متساوون في ذلك. إنما العلم بالتعلم وإنما الحلم بالتحلم، إنما الصبر بالتصبر صدق رسول الله وذلك معناه أن كل شىء يأتي بالتدريب ولهذا سرد الله لنا قصص الأنبياء لكي نقتدي بهم في الإرادة.

منقول من موقع أ عمرو خالد

:D كل اللي يجيبه ربنا كويس

السلام عليكم ورحمة الله وبركاته

أفاد مصدر مسؤول عن ظهور نتيجة الآنسة إنجي بدران ذلك وقد ظهرت كل المواد ووضح لنا المصدر أن هناك مادة كان يتعسر ظهورها وقد إستدعوا كبير الجراحين لإخراجها بالسلامة والحمد لله وصلت وهي تتمتع بصحة جيدة .... ، إلى الآن رزقت إنجي بخمس مواد بينهم توأمين غير متطابقين.

ربنا يقومك بالسلامة يا إنجي ويرزقك بالإمتياز ويبعد عنك المقبول يارب

ومن موقعنا هذا نهنئ المواطنة إنجي بالدرجات السعيدة وعقبال آخر تيرم يا رب

يارب إفرجها من عندك

بكيت عندما عجزت عن الكلام في أمس الأوقات لأن أتكلم

حلمت وتمنيت وعندما بقيت خطوة على تحقيق حلمي ، لم أستطع أن أخطوها

ما أصعبه من إحساس عندما تشعر أن أمامك ما تتمنى ولم تستطع أن تأخذه

لعله التشجيع والتقدير

حد فينا كان مقصر أو غلطان ولقى إن في شخص بيقوله إنت فاشل أو إنك مقصر أو قارنك بالناس اللي في سنك أو في نفس مجالك

كان شعورك إيه وقتها ؟؟

أنا واحدة من الناس اللي بيفرق معاها التشجيع والتقدير جدا جدا

كنت باتكلم مع ناس وبعدين بنتكلم عن القرآن فبيسألوني إنتي حافظة أد إيه

أنا الحمد لله حافظة 4 أجزاء ، أنا نفسي بجد أشد حيلي وأكمل

أنا كنت قاعدة مع ناس متدينيين وممكن يكون منهم اللي خاتم القرآن كله

وأنا باقول 4 أجزاء ما تتخيلوش نظرة الإعجاب اللي لقيتها في عيون الناس دي

حسسوني إني حاجة كبيرة أوي إني حافظة 4 أجزاء ومش كده وبس إدوني دافع إني أكمل وأكون عايزة أحفظ القرآن كله

التشجيع والتقدير يا جماعة ، ما تقللوش من شأن اللي حواليكم

ولو حد كان مقصر أو غلط في حاجة ، فكلنا بنخطأ ، وما تكرهش الغلطان لكن إكره الغلط نفسه

شجع الناس اللي حواليك وشجع نفسك ، قدر نفسك أوي وقدر اللي حواليك

حس بقيمة نفسك ، وبقيمة الحياة

أعبد الله بكل كيانك ، حب الدنيا وحب الناس

ولو حد قاللك يا فاشل قلهم لا أنا مش فاشل أنا في طاقة كبيرة وهاوجهها في سبيل الله عز وجل ، هانجح في دراستي في حياتي قول أنا عايز أطلع مسلم ناجح في حياتي

شوف إنت بتحب إيه وإعمله ، وتفوق وتميز فيه وخلي كل لحظة في حياتك لله عز وجل

إدعي ربنا يعزك ويعز بيك الإسلام

وإدعوا لي

يلا نتوب بجد

السلام عليكم ورحمة الله وبركاته

ازيكم جميعا :)

حد فينا قرأ أو سمع الأبيات دي :

فليتك تحلو و الحياة مريرة ….. وليتك ترضى, و الأنام غضاب
وليت الذي بيني وبينك عامر ….. و بيني وبين العالمين خراب
أبو فراس الحمداني

حد مرة عمل ذنب وليكن مثلا سرق ، والناس عارفين إنه حرامي ، وبعدين تاب ، والناس برضه مصرة إنه حرامي

حد مرة قال أنا ماليش دعوة بالناس أنا تبت وربنا سبحانه وتعالى عارف إني تبت ، وكفاية عندي هو ، والناس لو فضلت مصرة إنه حرامي فتصر

وليت الذي بيني وبينك عامر وبيني وبين العالمين خراب

ده مش معناه إننا نقطع العلاقات مع الناس أو نعاملهم وحش ، إطلاقا ، ده الإسلام بيحثنا إننا نعامل الناس بأحسن صورة وإننا نتعرف على الناس ونتعايش معاهم

لكن اللي أقصده إننا نقصد الله عز وجل فقط في كل أعمالنا وتصرفاتنا وأحوالنا وتوبتنا

ما تيجوا نخلينا أقوياء بالله عز وجل ، نرضيه ونحبه ونعيش ليه بكل كياننا ، بجد هيفرق معانا كتير

ربنا سبحانه وتعالى إسمه الودود إسمه الحق إسمه الرحمن الرحيم

إقصدوه في كل حاجة في حياتكم إلجأولوه ، هيعينكم وينصركم ويعزكم

أنا وإنتم يا رب:)

وما تقولوش مفيش فايدة ، ربنا سبحانه وتعالى بيقول :

وَالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَن يَفْعَلْ ذَلِكَ يَلْقَ أَثَامًا 68 يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا 69 إِلَّا مَن تَابَ وَآمَنَ وَعَمِلَ عَمَلًا صَالِحًا فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمًا 70

يلا نتوب توبة بجد ، وربنا سبحانه وتعالى هيتقبلنا جميعا بفضله ورحمته ومش كده وبس هيبدل سيئاتنا حسنات كمان

يا رب إرحمنا وإهدنا وإستخدمنا وإجلعنا في خدمة دينك يارب

نكت بااااااااااايخة :D

أقول لك على حاجة تصدمك ……
أوتوبيس

- ما هو الفرق بين الكذب و الكلب؟ …
الكذب مالوش رجلين لكن الكلب ليه

- ما هو وجه الشبه بين الغسالة و التلفزيون؟ … ا
لاثنين بيشتغلوا بأريال

ما هو وجه الشبه بين مترو الأنفاق و عود القصب
الاثنين بيعدوا على المعصرة

- المصري هو اللي بنى الأهرامات أمال الياباني بنى إيه؟… بناسونيك ها ها هاي

- أقولك على حاجة تجرحك
موس

- وجه الشبه بين فيفي عبده و البيبسى
دي غازية و دي غازية

- ما هو الحيوان الصغير آكل الزلط ؟
هو أخو الحيوان الكبير آكل الزلط

- ما هو الفرق بين الوزة و البطة ؟
الوزة كانت بطة بس الشيطان وزها

- حاجة بتعوم على المية و أولها حرف الخاء تبقى إيه
خشبة

- حاجة بتعوم على المية و أولها حرف الحاء تبقى إيه
حتة خشبة

- حاجة بتعوم على المية و أولها حرف الباء تبقى إيه ؟
برضة حتة خشبة

ايه اكتر حيوان مبيعرفش يستخبى ؟
الثعبان بان بان بان بان بان

ايه اكتر حيوان حظه وحش ؟
القطة علشان بتخربش كتير و عمرها ما كسبت

طيب ايه اكتر حيوان بيسمع اغاني اجنبي ؟
الغراب راب راب راب راب راب

طيب ايه اكتر حيوان بيسيح في الحر ؟
تمساح ساح ساح ساح ساح

ليه مفيش ماتشات بتتلعب يوم الجمعة ؟
علشان الكورة مع دريم

ليه مفيش ماتشات بتتلعب يوم السبت ؟
علشان إعادة الكورة مع دريم


ليه بلدياتنا بيحب يتصور جنب الأهرامات ؟
علشان يطلع في الشلن

-سمعت نكتة الأسانسير ؟
- لأ
- يبقى اكيد كنت طالع على السلم

إزاي نحط فيل في كباية من غير ما يلمسوا بعض ؟
نحط بينهم فيل تالت .

مرة واحد و لم يمر الآخر

عاوزين نركب 4 افيال على عجله نعمل ايه ؟؟
........... نركب فيل و نديله البرطمان يمسكه في ايده

حاجة سودة و ب 3 رجول و في الصحراء ؟
بيانو

واحد عنده 100 عيل و عايز يجيب عربيه تقضيهم .. يجيب ايه ؟
ميتسوبيشي طبعا ً ... و يدي كل واحد سوبشيايا .. [ميتسوبيشي = 100 سوبيشي ]

ليه Emniem بيركب الميكروباص ؟؟
علشان مش معاه غير 50 Cent

لو عندك تفاحة حمراء (امريكاني) و تفاحة خضراء (بلدي) و عايزهم يبقوا نفس اللون تعمل ايه ؟
تقشرهم :P

ليه السمك بيخاف من فودافون ؟
علشان اكبر شبكة

ليه النمل مش بترضي تركب الفيل قدامها عالعجله
عشان بيلعب في الجرس

لية بلدياتنا بيحط خيارة تحت المخدة؟
عشان لو حط طماطماية هتتفعص

حاجتين سود بينهم حاجة بيضة ايه ؟
عثمان احمد عثمان

بلدياتنا حب يزور ال10 دولار جاب 100 دولار و شال الصفر

ليه بلدياتنا بيشرب الدوا قبل معاده؟
عشان يفاجىء الجراثيم

ليه الفراعنة حاطين فى الهرم حديدة من فوق؟
عشان يرفعوه منها و ينضفوا تحتيه

ايه اللى يحصل لما البيسين يفضى ؟
مازينجر يطلع

طب ايه اللى يحصل لو مازينجر ما طلعش؟
ابو الغضب هيستولى على العالم

ليه ابوتريكة بيلبس فانلة 22 ؟
عشان 21 ضيقة عليه

طب ليه مبيلبسش 23 ؟
عشان فلافيو بيلبس 23

طب ايه هو الحيوان التعيس؟
القطة
ليه؟
عشان ديما تخربش ومتكسبش

طب ايه الحيوان اللي دايما مشغول؟
الخرتيت .. تيت .. تيت

طب ايه الحيوان اللي بياكل ويشرب بديله؟
الحيوانات بتاكل وتشرب بدلها .. عمرك شفت حيوان ساب ديلو وراح ياكل

طب ايه اقدم حيوان؟
الحمار الوحشي .. عشان ابيض واسود

طب ايه هو اجدد حيوان؟
اجدد حيوان هو الكنجارو علشان بكيسه

طب ليه التلاجة غبية؟
عشان بتحفظ الاكل .. مبتفهموش

مرة حلة رز شاطت جابت جون

ليه الاهرامات منتعشة ؟؟؟؟؟؟؟؟
علشان قدامها ابو الهولز !!!!!!

ليه الغواصين بيتكلموا بلغة الاشارة؟؟؟؟؟؟؟؟
علشان الحيتان ليها ودان

ليه السمك بيخاف من اتصالات؟
علشان أقوى شبكة.....

- طب ليه عملاء فودافون ما بيبردوش؟
علشان فودافون أقوى تغطية......

ليه القطر مهم
....... عشان تحتيه خطين

ليه سندوتشات الكفته والبطاطس بتجري
...... عشان وجبات سريعه

ليه اليابان معندهاش حنان
............. عشان ف قاره آسيا

ليه البرازيل معندهمش تين
............ .عشان ف امريكا اللاتينيه

ليه الفيل بينزل البحر بالشورت الاحمر .
.......... عشان الشورت الاخضر مش نضيف

ليه بلدياتنا بيحط جنبه منبهين
............ . عشان واحد يضرب والتاني يحوش

عكس نجيب محفوظ ؟؟ .
........ نودي

واحد بلدياتنا ماشي تحت الكوبري و رافع ايده ليه ؟
......... عشان الكوبري مسلح

عسكرى زهق من البندقيه عمل ايه
جاب حمصية.....

طماطمية عطست قالت
.... كا كا كاتشبب

حاجه بتجري وعندها راسين و 8 رجول
....... كلبين بيجروا جنب بعض

ليه القرد سريع
....... عشان القرد في عين امه غزال

حاجه ليها اربع رجلين وطايره في الهوا.
....... قطه مضروبه بالشلوت

عاوزين نطير كلب نعمل ايه
........... نضرب في ( 1\كلب )الكلب يطير مع الكلب

ليه النمل مش بترضي تركب الفيل قدامها عالعجله
......... عشان بيلعب في الجرس

فرخه معلقه سلسله فيها صوره بيضه ليه ؟؟
............ صورتها و هي صغيره

فرخه معلقه سلسله وفيها صوره طبق بيض اومليت ليه ؟؟
........... صوره اخوها الشهيد


ايه الفرق بين عمرو دياب و إليسا ؟؟
إليسا بتعمل شريط كاسيت ....
و عمرو دياب بيعمل شريط كاراجل ....

ليه المنبه بيرن
....... عشان مش معاه رصيد يتصل

ليه القطه بتدخل عن الحلاق_
...... عشان الباب مفتوح

طب ليه الأقرع بيدخل عند الحلاق _
........ عشان ياخد القطه

ليه الصيدلي بيبني عماره_
......... عشان يسكن الآلم

طب وليه العماره وقعت
.......... عشان بنااادول إكسترا )

ليه قبضوا على صاحب شركه جهينه
.......... عشان ( زبادو ) متلبس

ليه القطه بتخربش
............. . عشان نفسها تكسب

ليه الأهرامات تلاته بس
.......... عشان الشلن مش هايكفى نحط واحد كمان

ليه السائح بيتصور جنب الاهرامات
.......... عشان يطلع في الشلن

ليه الام مدرسه
........ عشان بتذاكر لولادها

عكس بالونه ايه ؟؟ .
........ نشفونا

ليه الفيل بيلبش شرابات خضرا
........ عشان خضرا بتلبس شراباته

ليه عمر دياب و هو بيقول فى اغنيه راجعين مخبطش فى اللى وراه
عشان طلعت زين واقف وراه وبيقولو تعالا تعالا

حكموا على صاحب شركه موبينيل احكام كتيره اوووي ليه
...... عشان بيتحاسب بالثانيه

ايه وجه الشبه بين البطيخ و الشمام
....... الاتنين اجازه الحلاقين


__________________________

_________________________________
منقول

مدونتي الجديدة :D

السلام عليكم ورحمة الله وبركاته

أنا لقيت إن مدونتي بقت ملخبطة على بعض ، بقت حاجات شخصية على وجهات نظر على قصص على كلام نفسي أقوله

فبصراحة في بعض المواضيع اللي كنت بحس إنها بتفرق معايا ومع اللي بيقراها

فجمعت كل المواضيع دي وعملت بلوج ، زي ما تقولوا كده كتاب بيضم وجهة نظري في مواضيع مختلفة

المدونة إسمها وجهة نظري

المواضيع اللي فيها كلها متكررة لكن متجمعة مع بعض في مكان واحد

اتمنى إنها تعجبكم وتفيدكم :)

أحلم معايا

أحلم معايا .. ببكرة جاي
ولو ما جاش أحنا نجيبه بنفسنا

نبدأ نحاول .. فى الطريق
كتر الخطاوى تدلنا على حلمنا

مهما نقع .. نقدر نقوم..
نشق... نتحدى الهموم
نلاقى ليلنا ألف يوم .. بس أحنا نحلم

أحلم معايا يا صديق
تطوى الخطى ارض الطريق
يهمنى حلمى البرىء مهما يكون

يفضل بروحه جنبنا
مهما يطول منا الطريق
لو حتى توهنا يا صديق
يرجع لقانا يضمنا
على حلمنا .. على حلمنا

بس أحنا نحلم

... ذكريات

واشتاق للحظة من زمان أروح أنا لنفس المكان يوم لما كان مليان حياة

كأني شايف كل شئ آدي البشر وآدي الطريق

أجري وأسلم يصدني صمت الحطام

... ما أصعب أن تشعر بالحزن العميق

عشتُ دهراً وفي..
مُقلتي أدمُعي ..
ذاكراً ما مضى ..
يوم كنت معي..
يوم كنت معي..
صوتُكَ العذب قد..
ظل في مسمعي ..
منذ قلتَ الوداع..
آه.. لم ترجع ..
آه.. لم ترجع ..

كنتَ صدر الحنان..
كنتَ نور القمر ..
كنتَ عند اللقاء ..
بسمةٍ في الأثر ..
بسمةٍ في الأثر ..
أنتَ نقشُ الأمل ..
في الفؤادِ إنحفر..
كيف قد قلتَ لي ..
حان وقت السفر؟!
حان وقت السفر؟!

يا صديقي تعال ..
انت نبض الزمان ..
كيف احيا بلا ..
مهجةٍ أو شجى؟!
مهجةٍ أو شجى؟!

يوم ودعتني
كان يومَ المحن
الوداع الوداع
كنتَ احلى وطن
كنتَ احلى وطن

... من غير ولا كلمة

حاسة إن في حاجة كبيرة أوي ماتت جوايا

حد حس قبل كده إنه يكون عايش في حلم جميل وبعدين يفوق منه على كابوس قاسي أوي

هو ده إحساسي دلوقتي

تعمل إيه ؟؟

السلام عليكم ورحمة الله وبركاته

تعمل إيه لو كنت ماسك شغل وبتشتغل فيه وبعدين عرفت بالصدفة إن شغلك ده إتعمل وإنت لسه بتشتغل فيه يعني بتضيع وقت في حاجة خلصت خلاص ... هتحس بإيه وقتها

يعني إنت تكون بتشتغل وبتتابع شغلك وبعدين تلاقي حد عمل شغلك من غير ما يقولك ، يعني ولا إستأذن منك ولا حتى يبلغك بنتيجة الشغل ده.

طيب لو مريت بالموضوع هيكون إيه رد فعلك ، هل روحت لرؤسائك وبلغتهم باللي حصل ، طيب هل وجدت منهم رد فعل إن الموضوع ده بسيط وإنك إنت اللي مكبر الموضوع ، يعني طلعت إنت كمان اللي غلطان

طيب روحت إتكلمت إنت مع الشخص اللي خد شغلك ولقيتوا مقتنع تماما إنه مش غلطان وإنك إنت اللي غلطان !!

طيب لو حصل معاك كل الحاجات دي ممكن يكون رد فعلك إيه بعدها ؟؟؟

أنا فعلا عايزة أعرف رأي كل الناس اللي هتقرأ الكلام ده ... أي حد يدخل على المدونة يرد على الموضوع ده بعد إذنكم

جديد × جديد

السلام عليكم ورحمة الله وبركاته

لو فجأة كده قالوا لك إنت هتسيب أهلك وبلدك وأصحابك وشغلك وكل حاجة في حياتك وهتسافر تقعد في بلد تانية مع ناس تانية بيتكلموا لغة تانية وتبدأ حياة تانية

ودي مش حاجة مفروضة عليك ، يعني ممكن ما ترضاش

بس إنت بإيدك هتوافق وهتروح البلد دي مع الناس دي اللي بيتكلموا اللغة دي وتبدأ الحياة دي

يعني كله جديد × جديد

مخاطرة مش كده ...

أنا من رأيي في الموضوع ده حاجتين ...

أولا: الإنسان في أي مكان لازم يكون ليه دور ولازم يرمي بذرة ومش لازم يشوفها لما تطرح بس يسيبها ويحاول يرويها أو يسيب أثر في الشخص اللي بذر فيه البذرة دي تروي البذرة دي

ما ينفعش أقول علشان أنا مش في بلدي ولا مع أهلي إني ما أثرش في المكان الجديد ده

بالعكس ده أنا أتعلم الناس دي بتفكر إزاي وبتهتم بإيه وأحاول أوصل لهم فكري وأفكر إزاي أوصل لهم الإسلام بأحسن صورة وأحسن شكل

وزي ما كنت باعمل في بلدي أعمل في البلد التانية

ثانيا بقى : هل في حاجة كبيرة أوي أكبر من الوطن والإستقرار تسمح للشخص ده إنه يسيب أهله ووطنه وأصحابه وشغله وكل حاجة علشانها

هل هي الفلوس ، هل الحياة الجميلة المرفهة أو حتى الحياة في جو جميل مع ناس بتحترم النظام ، هل الدراسة ،،،

إيه أهم من الإستقرار ودفء الأسرة؟

لو حد قاللي أنا ما بحبش البلد دي ، دي مليانة مشاكل والناس فيها مش منظمة ومش بتحترم بعض والجو فيها دخان وقرف والناس على طول تلاقيها بتتخانق وبتتعصب

طيب لو إنت كنت في مشكلة في أي مكان في الدنيا هل حلها هو إني أهرب منها ولا إني أواجهها وأحلها

زيها برضه بلدنا ، بلدنا زي ما فيها حاجات حلوة كتير فيها برضه مشاكل ، لكن إني أسيبها وأقول أروح أعيش في مكان تاني ده عمره ما كان حل

أي شخص في الدنيا بيأثر ودوره بيفرق ولو هو قال أنا مش بأثر ده أنا واحد يبقى مش مقدر قيمة نفسه

لأ دوره بيفرق وبيأثر جامد في كل اللي حواليه بس هو يسلك الطريق الصح وأولها توكله على الله ثم ثقته بنفسه وقدرته على تغيير الواقع اللي مش قادر يتكيف معاه ...

يعني البلد الجديدة اللي هيروح يقعد فيها ، ليه هو عايز يقعد فيها ، أكيد علشان سبب ما وزي ما قلت ممكن يكون للدراسة ، للبيئة للفلوس

طيب ومين اللي خلى البلد دي بالشكل ده أكيد الإنسان

الإنسان هو اللي طور بلده هو اللي بنى فيها إقتصاد قوي هو اللي بيهيأ فيها مناخ حلو هو اللي بيخلي البلد دي تتطور في كل المجالات العلمية

فليه ندي لغيرنا وممكن ندي لينا ؟؟

وجزاكم الله خيرا

... لكن

السلام عليكم ورحمة الله وبركاته

ليه العلاقات بين الناس بتتقطع

وليه دايما بنبدي مصالحنا وإهتمامتنا الشخصية على علاقاتنا مع الناس

ليه شايفين إننا لو إدينا من اللي معانا فاللي معانا هينقص مش هيزيد

ليه ما نحبش اللي حوالينا بكل إحساسنا وجوارحنا

ليه ما يبقاش هدفنا هو حب الناس ونشر الحب بينهم

تخيلوا لو الدنيا ملاها الحب

تخيلوا لو السعادة ملت الدنيا

هنعيش ملوك

لكن